بلوچی لیب ءُ گوازی

نبی آدم چہ کُرنانی کُرناں گوں فطرت ءَ بک ءُ ڑک ایں۔ آنہی ءَ وتی اے جہد شے آ زگرا بنا کُت ءُ نون داں آزمان ءَ سر بوئگ ایں۔ اے در ہیں دیمرئی ءِ تہا ہمودا کہ سائنسی علم و زانت ءِ کڑدارے ادا کتہ، ہمودا صحت مندیں دل ءُ سلیمیں دماغ ءِ سانڑی کنگ ءَ پہ لیب ءُ گوازی ءِ کڑدار ءُ ارزشت شموشگ نویت۔

گشنت کہ لیب اصل ءَ فارغیں وہد ءُ پاس ءِ شریں ءُ ، سلیمیں کارانی تہا گوازینگ ءِ نام انت، کہ دل ءَ وشی ءَ بہر کنت ءُ جان ءَ گرمائش ءُ دُرا ئی۔ آں وہد و پاس کہ مردم شے روزروزینی کاراں مہتل بیت تو دلءِ وشیءَ پہ لیباں لیب کنت۔ دنیاءِ دیمرئی کپتگیں راجاں بچاریں تو معلوم بیت کہ اودا لیب ءُ گوازی حاصیں اہمیت و ارزشتءِ دارنت۔

مئے ءُ ہمسائیگیں ملک چین بابتءَ گشگ بیت کہ آں ملکی درمان جاہ بزاں ہسپتال ویران انت بلی آنہانی لیبی میدان آباد انت۔اے حبرے سرا دو گپ یا رائے دارگ ممکن نہ انت کہ درائیں ءُ شریں چاگردے اڈ دیگے تہا ہمودا کہ سیت مندیں کار ءُ دز گٹی ءِ بیگ زلوری ایں، ہمودا صحت مندیں شریں چاگردے ءِ دارگءَ پہ لیب ءُ گوازی ہم المی انت ۔ اے لیب شہ کُرناں بنی آدمءَ وشی آں بہر کنگ انت۔ ہمے راستیں گپے ایں کہ قومانی تہا جوائیں ءُ مثبت سوچ و پکر ءِ ودی کنگ ءَ پہ لیب ءُ گوازی اہمیں کڑدارے دارنت۔
رندی عہد باری آں دہ کسان سالیں چکاں ءُ ورنائیں مڑدماں وتی وختءِ مطابقءَ لیب کتنت۔ پدا لڈءُ بوج کنوکیں قومانی تہا لیب ءُ گوازی وتی جدائیں پیمےءَ دیمرئی کننت۔ عہدی لیبانی بابتءَ گمان ایش انت کہ آنہانی تہا دیمی داتگیں یکے نا یکے فلسفہءِ گون بیتہ۔
١۔ جسمانی ورزش ءُ ردوم ءِ حاترا سودمندیں ءُ گرانیں لیب جوڑ بیت انت کہ آں ہجرت ءُ لڈ و بوج کنوکانی زلورتاں پیلو کننت۔
٢۔ دماگ ءِ تازگ دارگ حاترا ہم بازیں دماگی لیب ءُ گوازی اڈ دیگ بیتنت کہ آنہاں چہ پکر کنگءِ جہد زیات بیت۔
٣۔ جاندُراہی ءُ جان سلامتی ءِ ھاترا ہم لیبانی اہمیت بیتہ، ءُ بازیں لیب مردمانی جان سلامتی حاترا ہم جوڑ بوتنت۔۔
٤۔ عہدی دور باری آں اکثر لیب در اصلءَ پہ چاگردی زلورتانی پھیلو کنگءَ اڈ دیگ بوتنت۔ آں زمانگ کہ جنگانی زمانگ ایں ءُ وتی پاریزگ ءُ دژمنءِ لوغا گولے برگ ءُ وتی مول ءُ مراد حاصل کنگ اہم تریں مقصد بوتنت۔ چو کہ ما ''جی'' ءِ تہا گندیں کہ دائرہءِ مثال قلعہ انت ءُ یہ لشکرے اندرا بند بیت ءُ وتی حفاظت کنت ءُ دومی ٹیم حملہ آورے ڈولا اُرش کنت آنہاں کشیت۔
ہمے ڈولا گھوڑ دوڑ، نیزہ بازی، نشانگ جنگ، گو درکھگ، کپگی ءُ بازیں دیگہ لیب خالص جنگی ہیل کاری انت۔
٥۔ لیبانی تہا دل ءِ وش کنگ ءِ پہناد ہم المیءَ گندگ بنت۔ بازیں لیب ءُ مجالس دلءَ وشی ءُ تبءَ شادمانی ءِ سامان دنت۔ بلوچانی بازیں لیب بس یک جاگہہءَ جمع بوئگ ءُ مڑدانی مجلسءُ لیبانی مزہ گرگ ھاترا انت ۔ پدا لیوانی تہا کٹگ ءُ ہارگ وت یک زیندگیں جذبگءِ ودی کنت۔کٹوک اگاں نوکیں حوصلہ مندیءِ ءُ احساسءِ تفخرے باڑت ہمودا ہاروکءَ پدا جہد کنگءِ وشیں آسے دلا روک بیت۔
گُڈ سری ما ہمے گشوں کہ لیب در اصلءَ فارغیں وہد و پاسانی گوں سودمندیں مشاغلاں گوازینگءِ نام انت کہ آں مڑدماں دل وشی، جاںسلامتی، دماگی ورزشءَ اواریگءَ قومے ورناآں پہ وتی چاگردے پہریزگءَ تیار کنت۔ بلوچانی تہا شے کُرناں اے دیمری داتگیں لیب لیو بنت۔
گھوڑ دوڑ، نیزہ بازی، نشانگ جنگ، گو درکھگ، کپگی ، جی، ہڈوکی، ٹپاں چیری، چم بندگ، ہست، گری، گسنڑی، پری، چمبا دارگ، دوتک سوارگ، ڈنڈا سوٹا، پنجکائی، چیکلی، مجولی، قطار، چوڑی چوڑی گوازی، سادی، زحم جنیءِ لیب۔۔
ما ایدا کمیں اہمیں لیبانی قانود ءُ لیبءِ تفصیل دئیگاں اوں۔
جی (ماریا)

روش دراتکغی نیامگے بزاں سلیمانی بلوچانی تہا اے لیب ءَ ''ماریا'' گشنت۔ بت بیت اے نام تاریخ ءِ لڈو بوژانی تہا شے سندھ ءَ زورگ بیت ءُ اے loan wardءِ معنہ انت جتہ یا کُشتہ۔اے لیب سندھ ءُ پنجابءَ کنڈی پیمیں جسمانی ورزش ءُ ذہنی تفریح ءِ لیبے ایں۔بلوچ علاقہانی تہا اے لیب کساں سالیں مردینیں چکانی ءُ ورناآنی نیاما باز گوں دل ہبءَ لیب کنگ بیت۔اے لیوے وہد ءُ پاس دومی اکثر لیبانی ڈولا دیگرے ساڑتھیں وختیں یا ڈا ساڑتھیں ماہیکانیں شف انت۔ اے لیب ءِ حاترا نوکیں دور ءُ باریانی اسٹیڈیم ءِ درکار نیست انت، بلکہ سارتھیں، نرمیں پٹ ءُ ریک ءِ میدان اے لیوے حاترا آئیڈیل ایں جاگہہ انت۔ حاصیں وڑےءِ سیٹی ءُ کوکارےءِ پدا دراں میتگاں چہ ہم سنیں ءُ سینگائیں مڑدینیں چک ہمے ریکے پٹ ءَ یکجا بنت۔ اے لیبءِ حاترا چہ پیسرا ہچ وڑیں ٹیم تیار نہ بنت بلکہ ہر کھے لیبی سانڑی ءُ موجود بنت ہماہاں شے دو بروبریں ٹیم جوڑ کنگ بنت۔ اولی سرا دو سروک ءِ انتخاب بیت ءُ اے لیڈر جدا جدا اوشتنت۔ نون دومی دراہیں لیبی ءَ جوڑی جوڑی بوئگءِ گشگ بیت۔ نون آں لیبی کہ ہم سنیں، بروبریں، ءُ قد ءُ کیل ءِ اعتبارا بروبریں طاقت ءُ قوت داروکیں جوڑی جوڑ بنت۔ پدا ہم لیبییانی بہر ءُ بانگ ءِ فول پروفیں قانودءِ گوں تقسیم بیت۔ اے جوڑی کمیں دور رونت ءُ وتی وتی چیری نام ایر کننت۔مثال بزاں مرید ءُ مواراں کہ جوڑی انت نون یکے نام ماہ انت ءُ دومی ءِ نام انت استار، اے کہ ٹیم سروکانی کرا کائیت تو وتا ر ماہ ءُ استار گشنت۔ نون ہر یکیں ٹیم سروکےءِ باری انت آں یکے ءَ ہمے نوکیں نام ءَ چہ گشینیت۔ ہمے پیما دراں لیبی بروبریں وڑے ءَ تقسیم بنت۔بازیں وہداں اے بروبریں بہر بانگ وہداں قد۔ وزن، طاقتءُ لیبی صلاحیت باز گوں توجہ ءَ گندگ بنت۔ اگان ہچیں لیبیءِ ایوکا سر کیت تو آن دہ ہمے پیمیں فول پروفیں وڑے ءَ یہ ٹیم ءَ تہا دیگ بیت۔ چوں بیت کہ آں لیبی کمیں دور روت ءُ پشت کنت اوشتیت۔ دوئیں دستاں سغرا چہ بڑزا باڑت ، یہ دستے بند کنت ءُ دومی دستا تاڑی جنگ وڑا پچ داریت۔ نون ہر یکیں ٹیم سروکےءِ واری انت آں مشت یا تاڑی نیاما چہ یکے گشینیت۔ کھلاڑیءَ گشگ بیت کہ آں وتی مرضی ءَ یک دستے جہلا بیاریت۔ ہر ٹیمءِ کہ دست بُڑزا سر کیت آں لیبی ہماں ٹیم ءَ آوار بیت۔اے گشینگءَ را ''مشت یا تاڑی ''گشنت۔
اے لیبءِ تہا ہچ پیمیں ریفری یا شرا کنوک نہ بیت۔ ہر یک ٹیم ءِ سروک وتی وتی ٹیم ءَ ہمے ریکے نرمیں میدان ءَ کاریت۔ اے وہدا یکے پراہیں دائراہ ءِ گوں پاداں جنگ بیت۔ دوئیں ٹیم سروک اگا بنت او گوں پادا دائرہءِ لکیر کش انت۔ دراہیں لیبی آہانی پدا لکیرےءِ نشانءَ کشانا ءُ لیوے حداں زاناناں رونت۔ دائرہ کہ جوڑ بیت تہ ٹاسک کنگءِ وہد کیت۔۔یکے چپڑیں سنگے زورگ بیت ءُ آنہیءِ یک دیمےءَ تر کنگ ءَ پدا '' ہشک یا ترــ'' زیرگیءَ پد آں سنگ ہوا نیاما سٹگ بیت۔ یک ٹیمےءِ ہشکیں دیم ءُ دومی ٹیمءِ تریں دیم بیت۔ نون سنگے ہرگیں دیمے کہ درا بیت ہماں ٹیم لیڈر دائرہءِ اندر ا یا درا بوئگءِ پیسلہ کنت۔ پدا لیب بنا بیت۔یک ٹیمءِ قلعہ بند بیت بزاں دائرہ ءِ اندرا روت ءُ دومی ٹیم ءِ لیبی درا چہ حملہ آورے ڈولا اندرا کائیت ءُ اُرش کننت۔ دری لیبیاں گوں باز شیواریءِ اندری بزاں تہی لیبیاں دست جنگی ءُ پدئیگی دائرہءَ شہ درا روغی بیت او اگاں دری کھلاڑی ، اندری لیبیءَ دست جنگءَ پدا دائرہءَ چہ درا سر بیت تہ آں لیبی کہ آنہیءَ دست جنگ بیتہ مُڑتگ زانگ بیت او اگاں آں لیبی کہ اندرا شُت ءُ دست جت آں ہمودا اندری ٹیمءِ لیبی آں گپت تو آں دری ٹیمءِ لیبی مُڑدگ لیکھگ بیت۔ ہمے پیما داں وختا کہ دری یا اندری کھلاڑی دُراں out بنت تو نوکیں لیبءِ شروعات بیت۔ اے لیب اصلءَ یک تیاری انت کہ اگاں جاگہءِ حملہ کنگی بیت تو چوں دومی دژمنا جنگ بیت ءُ اگاں دومی قومی اُرش کنت تو وتی پہریزگی انتظام چوں بیت۔ اے لیب کساں سالیں چھوروانی ءُ نوک ورنائیں مڑدانی تہا باز پسند کنگ بیت۔

ہست اے لیب ہم عید ءُ سورءُ شادیہانی وہداں لیب کنگ بیت۔نزیکیں سیالیں قومانی نیاما مقابلہ بیت۔ اے لیب تہا لیبیانی تعداد مسلہءِ نہ ویت۔۔ہر نیمگ ءَ چہ وتی واری سرا یک لیبیءِ درا کیت ءُ دومی ٹیم ءِ دو لیبیاں ہکال دات۔ آں نیامغءَ چہ تیاریں دو لیبی ایشی پدا تچنت ءُ ایشیءِ گرگی جہد کنت۔ اے لیو ءِ قانود ءِ ردا دراتکگیں مڑدم وتی پدا آؤکیں کھلاڑیاں سے برا دست جت

بزاں یکیءَ دو برا ءُ دومیءَ یک بری دست جت ءُ گڑدی پدا ہماں جاگہہءَ روت ہمودا شے آں میدانءَ پترت۔ اگہ اے دورانءَ آں مڑد گرگ نہ بیتہ تو آں سوبین انت۔ آں ٹیمءَ ایک پوائنٹءِ رسیت۔ دومی ٹیمءِ مڑدم وتی وس کنت کہ آں گرگ بیت ءُ اکثر وہداں زمین سرا دور دیگ بیت۔ اگہ آں لیبی گرگ بیتہ تو پدا تشوخیں ٹیمءَ یک پوائنٹءِ رسیت۔ لیبءِ گُڈ سرا دوئیں نیامگءِ درشتگیں لیبی شمار کنگ بنت۔ ہر ٹیمءِ زیات لیبی آں وتی گرگ نہ دات آں ٹیم سوب مند زانگ بیت۔ ای لیبءِ تہا ہم ریفری یا شرا گڈوکیں مڑدم شی ہماں سانڑی ایں مڑدماں یک اسپیت ریشیں مڑدی گشینگ بیت۔ ای لیبی مقابلہ چو کہ گوں نزیکیں سیالیں قوماں بیت تو باز وہداں لیبی باز گوں زورا سٹگ بنت ءُ ہمی سوب ءَ باز وہداں لیبی یک دگری ءِ دست پاداں بورینات۔
ای لیب پھشتا دہ ہماں جنگی سماج ءُ آں وہدی گزر ءُ زلورت گندغا کائینت کہ چوں دژمنا ہکل دیغی حملہ کنگی ءُ حیرتا گوں گڑدگی آئیگ بیت۔

کپگی ای لیب ءِ تہا لیبی بروبریءِ بنیاتءَ بہر کنگ بنت۔ باز جاگہہ آں ماریا یا جی،ءِ قانود مطابقءَ لیبی بہر کنگ بنت۔ بلی اگاں مقابلہ گوں دومی سیالیں ٹھالاہیءَ بیگیں تو ہر پھلی وتی وتی لیبی آں کاریت۔ نون یک یک لیبی میدانءَ کیت۔ ہر دوئیں لیبی وتی یک یک پاد ڈوڑا کنت ءُ بند انت۔ نیں ہمی یک پاد سرا توازنءَ بروبر داشتگءَ میداں تہا کائیت۔ راستیں دست گوں یک دیگریءَ سلام ءُ وش آتک کنت ءُ پدا مقابلہ بنا بیت۔ بازیں جاگہہ آں پادی بندگ نہ بیت بلی یک دستی ءَ گوں پاد دارگ بیت۔ نون لیبی یک دست ءُ یک پادی ءِ سرا لیبءَ شروع کنت۔ داں دیرا زور لا ئیگ بیت۔ ہر وہدی کہ یکی ءِ پاد زمیں سرا کپیت یا آں وت توازن ءَ داشت ءُ مہ کنت تو دومی لیبی سوب مند زانگ بیت۔ ای وڑا دراں کھلاڑی وتی وتی وارا سرا میدانءِ کائنت ءُ لیبءَ بہر زورنت۔ لیبءِ گُڈ سرا آں لیبی شمار کنگ بنت کہ آنہانی پاد زمینءَ نہ کپت ءُ وتی مقابل ایں لیبی ءَ شکست دات انت۔ ہر یکیں ٹیمءِ سوبینیں لیبی زیات بنت ہماں ٹیم فاتح قرار دیگ بیت۔
اے لیب ءِ پشُدر دہ ہماں اولی کُرنانی جنگی ماحول ءُ آں وختی زحمانی جنگ انت۔ کہ ہر لشکرا شی یک یک بہاذری میدانءَ کاتک ءُ آں وختءَ دہ جنگ بیت کہ یکی ءَ ہمودا کشگ ءُ بیراں کنگ بیت ۔ پدا دومی مڑدم میدانءَ پترت۔

ہڈوکی ( ہڈاں گڈی)۔ ای لیب ماہیکانیں ءُ نیم ماہیکانیں شپانی لیب ایں۔ ای لیب زیات ہماں جاگہہ آں بیت کہ اودا لوغ ءُ گس ریکانی تہا انت۔ شپی اولی پہراں دہ سالا بگر داں ہژدہ سالی مڑدینیں چک ریکی ہمی پٹءِ تہا جمع
بنت۔ یک دیگریءِ گوانک جنگ طریقہ ہماں سیٹی ءُ کوکار انت۔ ایدا ہم لیبی ہر اعتبارا ،تاکت ءُ صلاحیت گندگءَ پدا لیبی بہر کنگ بنت ءُ دو ٹیم جوڑ بنت۔ ای لیبءِ تہا چو کہ نام ڈسگیں کہ یک حاصیں ہڈی کہ بھیڈی گشگ بیت کار مرز کنگ بیت۔نون دراں لیبی یک لکیری سرا بروبریغا اوشتنت ءُ یک ٹیمءِ لیبیءِ آں ہڈا دُور یک فاصلہءِ سرا دور دات ۔ ہڈ کہ کپیت ءُ آنہی کپگی توار کیت ءُ ہمی وختا دراں لیبی ہمی ہڈ پھولغءَ ءُ آرگءَ ہماں نیامگءَ تشنت۔ ہر یکیءَ کہ آں ہڈ دستا کپت آنہی سرا لیبءِ قانود ردا لازم انت کہ آں جار بجنت۔ کہ '' ہڈاں گڈی میں گرا ایں'' نون مخالف ٹیمءِ مڑدم آں لیبیءَ گرنت زمیں سرا دور دنت ءُ آںہڈ زنغ ءُ پھلغءِ جہد کنت۔ ای وہداں آں لیبی ہڈا وتی دومی سنگتا دات ءُ نیں دومی سنگت جار جنت کہ آں ہڈ میئں گُرا ایں۔ ای وہداں آں ٹیمءِ دو یا سی لیبی ای جار جنت کہ آں قیمتی ایں ہڈی آنہانی گرا انت۔ بل مخالف ٹیم شی آنہانی گپ جنگءِ اندازا زانی کنت کہ کئی دروگ بندگیں ءُ کئی کرا آں ہڈ ایں۔ آں کوشست کنت کہ ہڈا شی آں لیبی آں پھلنت ءُ وتی لوغا سر بنت۔ نون ای دار ءُ گرا پد ہر ٹیمءِ لیبی آں حاسیں ہڈا پھولنت ءُ کارنت آں ٹیمءَ یک پوائنٹ دیگ بیت۔
ہمی پیما ای ہڈ باز برا دور دیگ بیت ءُ لوٹگ بیت۔ آخرا ای حساب کنگ بیت کہ کجام یکیں ٹیمءَ زیات برا ای ہڈ لوٹت ءُ آرت۔ ہماں ٹیم سوبیین منگ بیت۔ ای لیبءِ پدا شپانی جاگگ ءُ نظر ءُ گوشانی ترندی ءُ مڑدمی شیواری ءَ سوہان دیگ مزنیں مول ءُ مُراد انت ءُ ای دہ ستاہ کرزیت کہ یکی دژمنا چوں دھوکہ دات ءُ وتی مول ءُ مراداں حاصل کنت۔

ٹپاں چیری ( لکھاں لوٹھی)اے لوغ اندرا لیو کنغی لیوی ایں۔ کساں سالیں چک بچ ءُ جنک ای لیوا گوں باز دل ہُباں لیب کننت۔ ای لیب تہا گوں حاصیں لیکھویءَ یکی لیبیءِ دُز جوڑ کنگ بیت ۔ دومی دراہیں لیبی جاگہہءِ رونت ءُ وتار چیر دنت بزاں لکھِنت۔نون آں چک کہ دُز جوڑ بیت آں دراہیں لیبی آں پٹیت ءُ پولیت۔ اولی برا ہر گیں لیبیءِ آں دُزءَ دیست ءُ آنہیءَ دست جتی آں نون دُز جوڑ بیت۔ نوں ای دوئیں دُز یک دیگری کمکءَ گوں دومی لیبیاں پولنت۔۔ہمی ڈولا باز برا ای لیب بیت ءُ لکھغ ءُ پولگءِ تجربت بیت۔

گھوڑ دوڑایے لیب بلوچ چاگردءَ آریائی پشدری ءَ چہ آتکا۔ ای بائدیں زانگ بیت کہ دراہیں فاتحیں قومانی تہا شریں نسلءِ گھوڑو ءُ ماذن دارگ بی تنت۔ عرب ،آریا،تاتاری، اوگان، ءُ بلوچ راج ای دراہیں قومانی مڑدماں وتی ماذن یا گھوڑا شی ساہءَ دوست بی تنت۔
دانکھو، ماذناں تاچیں ناں دل رشوخیں زوار۔مئیں وطن کس نہ باڑت، تئی وطن کس نہ باڑت
عیدُ سیرءُ شاذیہانی وہداں مڑدم وتی وتی چیٹٹگیں مادناں کھارنت ءُ دوڑ ءِ مقابلہءَ بہر زورنت۔ دراں سوار یک لائن ءِ سرا وتی وتی ماذناں زوار بنت ءُ بیرکی شاندی وداری بنت ۔ شاند رسگ ءِ گوں ماذن تاچینگ بنت۔ شی کلاں اگا آؤکیں گھوڑاءِ واژہ بزاں سوارانعام ءُ شانءِ حقدار بیت۔ پدا کٹوکیں گھوڑا یا مادن باز گرانیں بہاں بہا بنت۔
در اصل ای لیب تہا مزنیں کمال زین ءُ سنجاں ابید کوتلیں گھوڑوانی پشتا سواری ء کنگیں ءَ گوں مزلءَ سر بوئگ انت۔ ای ہما زمانگءَ چہ بلوچانی ءُ لڈ ءُ با ر کنوکیں عربانی زیندی المی ایں بہرتنت ۔
نیزگ جنگ۔ ایےلیب کہ ایشیءِ نیزہ بازی ہم گشگ بیت، زحم ءُ نیزگ ءِ جنگانی دور باری ءَ لیو کنگ بیتہ۔ یکی تو ایشی تہا گھوڑ سواری ءُ دومی ہمی رفتارا گوں دژمنءِ دل ءُ پہناذاں نشانگ گرگ ءُ نیزگ جنگ ءِ کمال ہنر شامل ات۔ ای لیب تہا زمیں سرا یک بالشتءَ شی دہ کسانیں بڑدست ڈولیں داری جنگ بیت۔ شہسوارا گوں پیلویں رفتار وتی مادن آرگی ایں ءُ ہمی جہلی دار ا وتی نیزگ جنگی انت۔ ہر سوارا نیزگ جنگ ءِ بازیں موہ دیگ بنت ءُ پدا حساب کنگ بیت کہ کجام نیزہ بازا باز برا اے نشانگ زڑتہ۔ اے پیما ہار جیت پیسلہ بیت۔

نشانگ جنگ

اے لیب یا مقابلہ ہم ہماں جنگانی دورباریانی جوڑ بیتگیں لیبءِ ایں۔ آں زمانگءَ گوں تیر کوانءَ نشانگ جنگءِ رواج ات۔ بڑدست ءِ ہڈ دور یہ پاسلہءِ سرا اڈگ بت ءُ گوں تیراں آنہی سرا نشانہ گرگ بیت۔ ای ڈولا لیب ءُ مقابلہ ہم بتاں ءُ پہ جنگاں تیاری ہم بیت ۔
مرشی باندا تیر کوان جاگہہءَ نوکیں دوری سلاہاں گپتہ ءُ نون گوں ہمی نوکیں توپکاں نشانگ جنگ بیت۔ بل آہری یا بڑدست سرا درُستیں نشانگ گرگ دانڑتی دہ مزنیں عزت ءُ شانءِ زانگ بیت۔ بلکی ای لیبءِ میان اُستمانی مقابلہ ہم اے دور باریءَ بوئگ انت۔ ای لیب یا مقابلہءِ پُشتہ ہم جنگی زلورت انت۔ اے لیب عید ءُ سیر ءُ مرادانی وہداں لیب بیت۔

گو (Race)پہوالی زندے مزنیں دارءُ مدار وتی بانڑ بیتنت۔ہر بلوچ ءَ مادن ءُ گھوڑو نیستت۔ نیں وتی پادانی سرا باور کنگ المی ایں حبری ات۔ چوکہ دنیا ءِ دومی راجانی تہا مرشی دہ درکغ ءِ ءُ دوڑی مقابلہ بنت بلوچانی تہا ہم ہمی ڈولیں سلیمیں مشغلہ استنت۔ سیر ءُ شادہانی وہداں گو درکگ یک لازمی ایں لیبء ایں۔ ای لیبءِ تہا ورنائیں گو بر دور جاگہہ رونت ءُ مزل یا نشان نیامگءَ درک انت۔ ہر یک کہ چہ کُلاں دیمترا بیت ءُ مزل ءِ بیرک ءَ دست ءَ بجنت ہماں سوبین منگ بیت۔ آنہیءَ را انعام دیگ بیت۔قبائلی زند ءِ تہا مرشی دی گو بریں مڑدم باز عزت ءُ شانءِ حقدار زانگ بنت۔

چمانی بندگ لیب ءِ تہا یکی لیبیءِ کہ حاصیں وڑی ءَ دُز جوڑ کنگ بیت آنہیءِ دوئیں چم بندگ بنت ءُ آنہیءَ وتی دومی سنگت پولگی بنت۔اے لیب کسان سالین چکانی لیب ایں۔ جنکیں ءُ مردینیں کسانیں چک لوغ ءَ اندرا اے لیبءَ لیب کننت۔

پری (مولائی) اے دہ بھیڈیانی حاصیں لیبی ءُ ہر عمرہ ءِ بلوچانی تہا باز گوں دل ہبا لیب بیت۔
سادی۔اے جنکانی لیب ایں۔ اے لیب سینگائیں جنک لوغءِ دیما گوں پیشیں سادی ءَ لیب کنت۔

قطار

اے برانی مال چارینوکیں پہوالانی لیب ءِ۔ زمیں سرا لکیراں جنت ءُ گوں بری رنگداریں کسانیں سنگاں لیب بیت۔ اے لیب تہا دماگ زیات کار کنت۔
بلوچانی کرا باز مزنیں ءُ پراہیں ملک ءُ زمین ایں ہمی سوب انت کہ ہر علاقہ ءُ دمگ ءِ تہا بازیں لیب لیو کنگ بنت۔ ما ایدا آں لیوانی پچار کتہ کہ سلیمان کوہءَ بگر داں تیاب دپا ہر جاگہہ ءَ گوں کسان مزنیں پرکیءَ لیب بنت۔ بازیں جاگہہ آں دومی بازیں لیب ہم لیب بنت۔ لیب ہر ڈولیں کہ بنت ءُ ہر جاگہہءِ بنت ، کُلانی مول و مراد یکیں ننت۔ آں اے کہ مڑدم جانءَ سلامتی ءُ سلیمیءَ دئینت دلءَ وشی آں بہر کنت ءُ چاگردءَ شی ڈنگاں پہریزنت۔ آں ملکاں کہ لیب زندگ انت اودا تریاق ءُ پڑی ءِ استعمال نیست انت۔ لیبانی کمال انت کہ مڑدم کھٹغ ءُ ہارغ ءِ ودئیں جذبگ آں چہ شناس ا بیت۔

غلام نبی ساجد