”میر ءِ کھیر” دو جاڑیں کھیر اَنت کہ ایشانی بُن ءَ کوھنیں کلات ءُ ماڑیانی بُن رِد ءُ نشان است اَنت۔ کوھنیں کِسہانی ردا ”میر ءِ کھیرانی” راجدپتر ھمینکہ کوھن اِنت کہ ھمے کھیرانی بُن ءَ کلات ءُ ماڑیانی بُن رِد ءُ نشانی۔۔۔۔۔ میر ءُ کھیرانی دمب ءُ ماڑیانی بُن رِد ءُ نشانی مند ءِ دمگ گوبرد ءِ رودرتکی نیمگ ءَ اَنت کہ اے ماڑی ءُ کلاتانی نشان ءُ بُن رداں چہ ھمے گپ پدر اِنت کہ اے باز کوھن اَنت ءُ ایشانی دامن ءَ ٹوھیں راجدپترے کَلّ اِنت۔ دمب دروشمیں کلاتانی پُرشتگیں بُن رداں چہ ھمے پدر اِنت کہ اے نشان ءُ آثار پیش چہ مسیح ءِ بیت کن اَنت ءُ ایشانی راجدپتر چہ اے ھند ءِ کوھنیں دمب ءُ نشان مھر کڑھ یا موھن جودڈو ءَ چہ پیش ءُ کوھن تر ھم بیت کنت۔ بلکیں ما اے ھم بہ گُشیں رد نہ بئیں کہ ”میر ءِ کھیر” ءِ راجدپتر ھمینکہ کوھن اِنت کہ ”بابلی” ءُ ”اسیریائی” راجدپتر۔۔۔۔۔۔۔
”میر ءِ کھیر” ءِ بابت ءَ سائنسی رھبندانی سرا ھِچ وڑیں چار ءُ تپاس دیم ءَ نیاتکگ۔ البت کماشانی دپ ءَ ھمے کِسہ ما اِش کُتگ کہ ”میر ءِ کھیر” ءِ تاریخ سئے ھزار سال کوھن اِنت۔ اے کِسہ ھم مشھور اِنت میر ءِ کھیر ءِ حاکمی کنوکیں میرانی سرا رودرتک ءَ چہ آیوکیں لشکرے ءَ اُرش کُتگ۔ کماشانی دپ ءَ ھمے گپ ھم ما اِش کُتگ ھما لشکر ءَ کہ کوھنیں دوراں اے ھنکین ءِ سرا اُرش کُتگ آھاں اسپ ءُ ھُشتر گون بیتگ ءُ ایشاں اے ھنکین ءِ سرا اُرش کُتگ ءُ جاھمنند درست جتگ ءُ کُتگ اَنت ءُ مال ءُ دلوتانی لُٹ ءُ پُل کُتگ۔ آھاں ادیے جاھمننداں کس پشت نہ گیتکگ، بس یک بَلّک ءُ نماسگے پشت کپتگ اَنت۔
اے چوشکہ ھما لشکر کہ آھاں اے ھنکین ءِ سرا اُرش کُتگ ، آھاں وتی سلاہ ءُ ازباب ءُ جنگولیں ورناہ ھُشترے لچانی تھا چیر داتگ ءُ بیگاہ ءِ وھد ءَ اَتکگ ءُ مندیگ ءِ کؤر ءِ دامن ءَ داشتگ ءُ پدا شپ ءَ مھلوک ءَ کہ سر واب ءَ جتگ تہ لشکری دراَتکگ ءُ بازار ءِ سرا اُرش یے کُتگ کہ آھاں ادا ھچ پشت نہ گیپتگ۔ کوھنیں کِسہے کہ ما پیریں کماشانی دپ ءَ اِش کُتگ کہ بازار ءِ مردماں نہ زانتگ کہ لچانی تھا چی است۔ آھاں پُرس اِتگ کہ لچاں چی است تہ لشکریاں گُشتگ کہ دان اَنت۔ بلے یک پیریں بلکے ءَ زانتگ اَنت کہ لچانی تھا جنگول ءُ سلاہ چیر اَنت۔ تہ آئی ءَ وتی نماسگ ھال داتگ ءُ شپ ءَ در کپتگ۔۔ آ گُشاں نماسگ ءَ بلک جُست کُتگ کہ لچانی چی است تہ بَلک ءَ جواب داتگ کہ
”آسن ء پولاتاں، او ورناہ ء بیگواتاں”
نوکیں دؤر ءَ میر ءِ کھیر ءِ بابت ءَ بازیں کِسہ اَنت کہ ما مھلوک ءِ دپ ءَ اِش کُتگ اَنت۔ بازیں مردم گُشنت کہ ”میر ءِ کھیر” ءِ رودرتکی دامن ءَ ھزانگے کَلّ اِنت کہ ھزانگ ءِ سرا دو مار وپتگ۔ یک مارے قد سئے گواز اِنت ءُ دومی ھژدھائے کہ دہ گواز دراج اِنت۔ بلے چوشیں گپاں علمی ءُ سائنسی حوالہ ءَ ھچ وڑیں راستی نیست۔
میر ءِ کھیر ءِ پُرشتگیں کلات ءُ ماڑیانی بُن رِدانی پراھی دو کلومیٹر بیت۔ کانچ دروشمیں سِنگ ءُ ڈوک ھم است کہ ماھکانییں شپاں ترپ اَنت۔ گُشنت کہ اے جاڑیں کھیراں جِن ھم جاھمنند اَنت، بلے ما شپ بہ بیت یا روچ ، اودا گَشتگ اِنت، بلے ھِچ چُشیں نشانی نہ دیستگ کہ جِنّ است۔ البت ماھکانیں شپاں ماں میر ءِ کھیراں ھما ترپوکیں سِنگ ءُ ڈوک شاعرانہ سِنچی ءِ حیالاں دینت ءُ یک ابدمانیں تاریخی یے یاتگیری ءَ کن اَنت ءُ بلوچ ءِ راجدپتر ءِ کوھنی ءِ نشان اَنت
”میر ءِ کھیر” دو جاڑیں کھیر اَنت کہ ایشانی بُن ءَ کوھنیں کلات ءُ ماڑیانی بُن رِد ءُ نشان است اَنت۔ کوھنیں کِسہانی ردا ”میر ءِ کھیرانی” راجدپتر ھمینکہ کوھن اِنت کہ ھمے کھیرانی بُن ءَ کلات ءُ ماڑیانی بُن رِد ءُ نشانی۔۔۔۔۔ میر ءُ کھیرانی دمب ءُ ماڑیانی بُن رِد ءُ نشانی مند ءِ دمگ گوبرد ءِ رودرتکی نیمگ ءَ اَنت کہ اے ماڑی ءُ کلاتانی نشان ءُ بُن رداں چہ ھمے گپ پدر اِنت کہ اے باز کوھن اَنت ءُ ایشانی دامن ءَ ٹوھیں راجدپترے کَلّ اِنت۔ دمب دروشمیں کلاتانی پُرشتگیں بُن رداں چہ ھمے پدر اِنت کہ اے نشان ءُ آثار پیش چہ مسیح ءِ بیت کن اَنت ءُ ایشانی راجدپتر چہ اے ھند ءِ کوھنیں دمب ءُ نشان مھر کڑھ یا موھن جودڈو ءَ چہ پیش ءُ کوھن تر ھم بیت کنت۔ بلکیں ما اے ھم بہ گُشیں رد نہ بئیں کہ ”میر ءِ کھیر” ءِ راجدپتر ھمینکہ کوھن اِنت کہ ”بابلی” ءُ ”اسیریائی” راجدپتر۔۔۔۔۔۔۔
