دمب شُناس ءُ گور پَٹانی ردا ماں بلوچ زمین ءَ یا ماں ھما ھنداں کہ اودا بلوچ نِشتگ، دز کپتگیں نشاناں چہ ھمے نشون رسیت کہ بلوچ ءِ راجی نشان یا علامت ”روچ” بیتگ۔ ایشی ءَ چہ ھمے پدر اِنت تاریخ ءِ بازیں وھد ءُ کرناں بلوچ ءَ روچ ءِ پرستش کُتگ، بلے بلوچ ءِ گوں روچ ءَ ھمگرنچی ءِ مول ءُ مراد اے نہ اِنت کہ بلوچ ءَ چو اے دگہ راجاں روچ وتی خدا گُشتگ ءُ آئی ءِ نام ءِ سرا چو عرب ءُ ایدگہ راجاں دومی راجانی کُشت ءُ کوش کُتگ۔ بلکیں ”روچ” پہ بلوچ ءَ رُژن ءُ آگہی ءِ نشان بیتگ ءُ بلوچ پہ رُژن ءَ زروک بیتگ۔ پدا پہ بلوچ ءَ روچ ءِ مستریں صفت اے بیتگ کہ روچ ابئید ءِ مُزّ ءَ وتی رُژن ءَ ماں جھان ءَ شِنگ ءُ تالان کنت ءُ بلوچ ءِ صفت ھم ھمیش بیتگ کہ بلوچ پہ رُژن ءُ آگہی ءَ زر اِتگ ءُ پہ دومی ءَ رحمدل ءُ آگہی بخشوک۔۔ھمیش بیتگ بلوچ ءِ پجار ءُ زانت۔۔۔۔۔۔بلوچ ءِ گوں رُژن ءُ زانت ءَ سیادی ءِ بازیں درور ءُ مثال است اَنت کہ مرچی بیگواھی ءِ سیمسراں سر بیتگ اَنت۔ بلوچ، بالاچی گھگیری ءِ منت ءَ زندگ بیتگ ءُ بالاچ بُرزیں آس ءِ بشارت اِنت ءُ رُژن ءِ نشان، ءُ رُژن گوں روچ ءَ سیادی داریت۔ پمیشا آس پہ بلوچ ءَ شرپ مند ءُ پاک بیتگ ءُ آس ءِ سوگند ءِ سرا بلوچ ءَ سِتک داشتگ۔ شھموکیں ”سُھیل” پہ بلوچ ءَ مقدس ءُ پاک بیتگ۔ چیاکہ ”سُھیل” رُژن ءِ نشان بیتگ۔ کسانیں زھگ چِل روچ ءَ پد سُھیل ءَ پیشدارگ بیتگ۔ دگہ بازیں انچیں مثال ءُ درور اَنت کہ بلوچ ءِ گوں رُژن ءُ آگہی ءَ ھمگرنچی ئے نشاندھی ءَ کن اَنت۔ راستی ھمیش اِنت کہ پہ بلوچ ءَ بس رُژن مقدس ءُ پاک بیتگ ءُ آئی ءَ بس رُژن ءِ پرستش کُتگ ءُ روچ وتی نشان زانتگ۔۔ اے سرجمیں درور بلوچ ءِ رُژن ءُ زانت ءُ آگہی ئے مانزمانی ءَ کن اَنت ءُ بلوچ ءَ عاقبت بخش ءُ ابدمانیں احساسے دینت۔
