بلوچ ءِ راجدپتر ءِ بابت ءَ ھِچ چوشیں راستیں سیاھگ یا کتابے دیم ءَ نیاتکگ کہ ما ایشی ءَ بلوچ ءِ راستیں راجدپتر سرپد بہ بئیں۔ ناسرجمیں رنگے ءَ لھتے سیاھگ ءُ کتاب کہ نویسگ بیتگ اَنت یا کہ کوھنیں شاعری ءَ ھما راجدپتری تران کہ گُشگ بیتگ اَنت تہ اے سرجم مذھب زدگ ءُ گواچن ءُ دلیل ءَ چہ ڈن بلکیں دروگیں حوالہانی بنیاد ءَ نویسگ بیتگ اَنت۔ البت لھتے کتاب کہ سیاھگ کہ تحقیقی بنیاد ءَ دیم ءَ اَتکگ اَنت کہ آھانی تھا واجہ سید ھاشمی ءُ واجہ حمید بلوچ ءِ کتاب ھوار اَنت۔ بلے سرجم نیاں۔ اگاں ما بلوچ ءِ زندمان ءُ زبان ءُ دگہ بازیں تب ءُ ھئیل ءُ بلوچ ءِ سرڈگار ءَ ھما کوھنیں دمب کہ است اَنت۔ ھمے سرجمیں راستیانی بنیاد ءَ بچاریں تہ بلوچ ءِ راجدپتر سک کوھنیں۔ بلوچ ھزاراں سالانی سیمسر گوازینتگ ءُ مرچیگیں دؤر ءَ سر بیتگ۔ بلے اے ھزاراں سالانی راستی بلوچ ءِ وتی نادلگوشی ءُ نَزانتکاری ءِ ھرجان بیتگ۔ تاں روچ ء مروچی ھم بلوچ نہ زانت کہ من کیاں۔۔۔
بلوچ وت ءَ قومی روایت ءُ قومی زبان ءِ پھازوک گُشیت۔ کدی کدی آ ھمے گپ ءِ سرا پھر بندیت۔ روایت پھازی ءِ نام ءِ سرا وت ءَ پُرشان ءُ مڑاھدار گُشیت۔ بلے اگاں پہ راستی بچاریے اے روایت پھازی ءُ زبان دوستی ءِ صفت ھچ وڑا گوں بلوچ ءَ ھمگرنچ نہ بیت۔۔ بلوچ سرزمین ءِ کوھنیں دمب ءُ آثاراں چہ ھمے نشون رسیت کہ بلوچ ءِ بلوچی نشان ءُ مونوگرام روچ بیتگ۔
روچ گوں رُژن ءُ زانت ءَ ھمگرنچ اِنت۔ چَراے نشان ءُ بلوچ ءِ مرچیگیں تب ءُ ھئیل ءُ آئی ءِ گوں آس ءَ سیادی ءُ آس ءَ پاکیں چیزی سرپد بوئگ ءُ ”آسچر” ءِ سوگند ءِ سرا یقین ءُ دگہ بازیں ربیتاں چہ اے گپ ھم زانگ بیت کہ بلوچ آتشت پرست بوتگاں۔ اے سائنسی راستی کہ اگاں یک راجی ءِ تاریخ ءَ وانگ لوٹئے تہ ھما زمین ءِ آثار ءُ زندمان ءُ زبان ءُ دگہ بازیں تک ءُ پیچاں چہ آئی ءِ گوں دومی راجاں سیادی ءُ تاریخ ءَ زانت کن یے۔ بلے بلوچ ءِ سرجمیں تاریخ مذھبی دروگیں کِسہانی بنیاد ءَ ٹھینگ بیتگ ءُ عرب زدگ اِنت۔
بلوچ پہ شانے وت ءَ عرباں ھمگرنچ کن اَنت۔ وت ءَ مسلمان گُشنت۔ بلے اے گپ ءَ کس نہ گُشیت کہ اسلام ءَ چہ پیش بلوچ کئے بیتگ۔ بلوچ پہ شانے ھمے گپ ءَ جنت کہ ما اے ھند ءُ دمگ ءِ درستیں راجاں چہ پیسر مسلمان بیتگیں۔ بلے پہ راستی اگاں بچارے ناں اسلام ءَ بلوچ ءَ چوشیں شھم پدے دیم ءَ داتگ ءُ ناں مسلمانانی خدا پہ بلوچ ءَ چوشیں رحم دلے بیتگ۔۔۔۔ بلکیں ھمے اسلام ءُ ھمے خدا ءِ نام ءَ سادگیں بلوچ ہر دؤر ءُ ہر زمانگ ءَ ریپینگ ءُ رَد دیگ بیتگ۔۔۔۔ تاں روچ ء مروچی کہ بلوچ بزگ ءُ عذاب اِنت۔ آئی ءِ قومیت ءُ دود ءُ ربیدگ ءُ زبان چرآئی ءَ پچ گِرگ ءُ پدمنتگ کنگ بیتگ اَنت۔ ھمے مسلمانیت ءِ نام ءِ سرا۔۔۔۔۔۔۔
دنیگہ تاریخ ءِ تھا اے گپ نیست اِنت کہ چاردہ صد سال پیسر بلوچ چون مسلمان بیتگ۔ تاریخ ءَ عربانی ھچ وڑیں چوشیں نشان نیست اِنت کہ آھاں جھاد ءِ نام ءِ سرا بلوچ جتگ ءُ مسلمان کُتگ۔ البت بلوچانی مسلمان بیئگ ءَ رند قاسم ءُ غزنوی آں مسلمانیں بلوچ جتگ ءُ آھانی گِس ءُ لوگ مانداشتگ اَنت۔۔۔ادا چہ زانگ بیت کہ بلوچ ءَ ربیت پھازی ءُ زبان دوستی ءِ ھِچ وڑیں صفت نہ براھیت۔۔۔ تاریخ ءَ ھما راج کہ تمرد ءُ جھان ءِ بازیں ھندانی حاکم بیتگ اَنت تہ بلوچ ءَ ھمایانی مذھب ءُ زندمان ءِ دگہ بازیں ربیت قبول کُتگ اَنت۔۔ تانکہ بلوچ ءَ آھانی زبان ھم پہ وت زُرتگ۔ بلوچ ریاست ءِ انتظامی زبان ھم فارسی ءُ عربی بیتگ اَنت۔۔ درسگاھاں عربی ءُ فارسی وانینگ بیتگ۔ عبادت ءُ ذکر ھم ڈنی زباناں کنگ بیتگ اَنت۔ چَرایشی ءَ چہ بلوچ ءِ قومی بنیاد نِزور ءُ آئی ءِ زبان پدمنتگ بیتگ۔ بلوچ ءِ خان ءُ میراں بلوچ ءِ زبان ءِ دیمروئی ءِ ھاترا ھِچ وڑیں گامگیج نہ زُرتگ۔۔
ایشی ءَ چہ زانگ بیتگ کہ بلوچ ھچ وڑا روایت دوست ءُ زبان دوست نہ اِنت۔ اجتماعی حوالہ ءَ آئی ءِ بلوچی ربیت دوستی ءُ زبان دوستی ءِ بٹاکاں ھچ وڑیں راستی نیست۔ اے گپ چہ مَزن ھور ءِ بازیں ملکاں نِشتگیں بلوچاں پدر اِنت کہ ادا ھر راج کہ ڈنی اِنت۔ آھاں وتی زبان ءُ ربیت برجاہ داشتگ اَنت۔ بلے بلوچ ءَ بلوچی ءَ گپ جنگ ھم لَج کنت۔ بزاں بلوچ ھما ھنداں کہ شُتگ آئی ءَ ھما دمگ ءِ ربیت وتی کُتگ اَنت ءُ ھما چاگرد ءِ تھا انچو ھوار بیتگ کہ تانکہ وتی زبان ءَ ھم شموشکار اِنت۔ ادا من بازیں بلوچاں گوں دُچار کپتگاں کہ آھانی پیدائش ھم بلوچستان ءَ بیتگ، بلے نا گوں دومی بلوچ ءَ بلوچی ءَ گپ جنت ناکہ وتی دود ءُ ربیتانی خیالے گور اِنت۔ بلکیں آھاں چو کبگ ءُ گولو ءِ مثال ءَ وت ءَ گوں گوجوارانی پوشاک ءَ سک بے براہ کُتگ ءُ بلوچ صفت آھانی تھا پشت نہ کتگ۔ بزاں بلوچی روایت ءُ دود ءُ ربیت ءُ زبان ءِ سرا پھر بندوکیں بلوچ ءَ بلوچی ربیت ءُ زبان ءِ آپ تاں آخری حدا گواز کُتگ ءُ وت ءَ پیش ءَ ھم عرب گُشتگ ءُ تا انگت ھمے اگال ءُ چِرک ءِ شوپچ ءَ کپتگ ءُ لھتے بلوچ چوشیں ھم است کہ آھاں رندا پاسپورٹ ءُ نیشنلٹی گیپتگ آھاں پیر ءُ کماشی جاہ ءَ ھم وتی نام بدل کُتگ اَنت ءُ عربی نام زُرتگ۔۔بزاں بلوچ ءَ ھِچ وڑا بالاچی گھگیری ءِ شان نہ براھیت ءُ گوج واری ءِ شوپچ ءَ کپتگ اَنت
بلوچ ءِ راجدپتر ءِ بابت ءَ ھِچ چوشیں راستیں سیاھگ یا کتابے دیم ءَ نیاتکگ کہ ما ایشی ءَ بلوچ ءِ راستیں راجدپتر سرپد بہ بئیں۔ ناسرجمیں رنگے ءَ لھتے سیاھگ ءُ کتاب کہ نویسگ بیتگ اَنت یا کہ کوھنیں شاعری ءَ ھما راجدپتری تران کہ گُشگ بیتگ اَنت تہ اے سرجم مذھب زدگ ءُ گواچن ءُ دلیل ءَ چہ ڈن بلکیں دروگیں حوالہانی بنیاد ءَ نویسگ بیتگ اَنت۔ البت لھتے کتاب کہ سیاھگ کہ تحقیقی بنیاد ءَ دیم ءَ اَتکگ اَنت کہ آھانی تھا واجہ سید ھاشمی ءُ واجہ حمید بلوچ ءِ کتاب ھوار اَنت۔ بلے سرجم نیاں۔ اگاں ما بلوچ ءِ زندمان ءُ زبان ءُ دگہ بازیں تب ءُ ھئیل ءُ بلوچ ءِ سرڈگار ءَ ھما کوھنیں دمب کہ است اَنت۔ ھمے سرجمیں راستیانی بنیاد ءَ بچاریں تہ بلوچ ءِ راجدپتر سک کوھنیں۔ بلوچ ھزاراں سالانی سیمسر گوازینتگ ءُ مرچیگیں دؤر ءَ سر بیتگ۔ بلے اے ھزاراں سالانی راستی بلوچ ءِ وتی نادلگوشی ءُ نَزانتکاری ءِ ھرجان بیتگ۔ تاں روچ ء مروچی ھم بلوچ نہ زانت کہ من کیاں۔۔۔
