تئی مهر منا در کار نه انت !

اکبر بارکزیی
تئی مهر منا در کار نه انت !
امروز چه وت بیزار مه بئے

اے دوست گـُل و گلزار به بئے

سَکّ دوست منا را تو دارئے

هر درد ءَ شریک ئے ، گـَم وارئے

تو لوٹ ئے که من هر پاس و دم ءَ

تئی دیما بننداں ، دور مباں

یک گـَپے بلے یات بیت انت ترا

گوشتگ من ترا هم باز بر ءَ

بے شک چو من و تو دوستیں بلے

تو کاراں منی اے کار مدار

اے هِیل ءَ بلے تو تـَرک ندئے

تو لوٹ ئے و هَنگت ڈکّ ءَ کن ئے

لوٹ ئے من تئی آدینک به باں

یک ساعتے اِچ تو دور مه باں

تو لوٹ ئے که اچ دنیا و جهان

من دور و من پهک ءَ دور به باں

من زاناں تو لوٹ ئے دوست وتا

رد کپتگ ئے تو سک بشک منا

چو کـُشت وتا را من نه کناں

رد کپتگ ئے تو ، رَد کـَپتگاں من

هچبر من نه لوٹاں مهر چُشیں

زند ءَ چه منا را دور به کنت

زُلپانی تئی باهوٹ بکنت

دُر گوشیں گـُلامے جوڑ به کنت

تئی دست منا مجبور به کنت

بیزاریں منا را مهر چُشیں

اے مهرے نه انت اے مهرے نه انت

اے سِحرے بَدیں و مهر کـُشیں

اے مهر ءَ وتی اے مهر ءَ به بر

تئی مهر منا در کار نه انت !!

تئی مهر منا در کار نه انت !!

**********************